اعلیٰ دینی مرجعیت کے نمائندے، شیخ عبدالمہدی الکربلائی نے اس بات پر زور دیا کہ اہم سائنسی شعبوں پر توجہ دی جائے جو انسانی معاشروں کی ترقی میں معاون ثابت ہوتے ہیں۔ انہوں نے معاشرے کو ان تخصصات کی اہمیت سے آگاہ کرنے اور اعلیٰ تعلیم کی طرف توجہ دینے کی ضرورت پر بھی زور دیا۔ یہ بات انہوں نے اس وقت کہی جب حرم مقدس حسینی سے وابستہ جامعة وارث الأنبياء (علیہ السلام) کو عراق کی نجی جامعات کی 2024 کی قومی درجہ بندی میں دوسرا مقام حاصل کرنے پر اعزاز سے نوازا گیا۔ اس موقع پر حرم مقدس حسینی کے سیکرٹری جنرل، جناب حسن رشید العُبایجی بھی موجود تھے۔
اپنی تقریر میں اعلیٰ دینی مرجعیت کے نمائندے نے فرمایا:
ہم آپ کو اس عظیم سائنسی کامیابی پر مبارکباد پیش کرتے ہیں۔ اس سے پہلے کہ میں ان کامیابیوں پر بات کروں جو آپ نے ان چند سالوں میں حاصل کیں، میں یہ واضح کر دوں کہ ہماری آپ کے لیے پیغام بالکل واضح ہے، اور وہ یہ کہ جامعات، اسپتالوں، اور سائنسی اداروں کا قیام انتہائی ضروری ہے۔
انہوں نے مزید کہا:
"ہم علم کو اس نظر سے دیکھتے ہیں کہ اللہ تعالیٰ نے انسان کو عزت دی اور اسے علم و معرفت کے ذریعے بلند مقام عطا فرمایا۔ ہر انسان کی قدر و قیمت اس کے علم و ہنر کے مطابق ہے، اور ظاہر ہے کہ سب سے پہلے علم ہی اس کا بنیادی ذریعہ ہے، کیونکہ یہی وہ اساس ہے جس کے باعث اللہ تعالیٰ نے انسان کو زمین میں خلیفہ بنایا۔
انہوں نے مزید وضاحت کی کہ جب یہ نظریہ حقیقت میں تبدیل ہوتا ہے، تو ہمیں اس پر بے حد فخر ہوتا ہے۔ اسی لیے ہم آپ سب کے شکر گزار ہیں کہ آپ نے اس پیغام کو عملی شکل دی، اور اب یہ حقیقت میں ایک زندہ مثال بن چکا ہے۔
مزید برآں، انہوں نے کہا:
ہم ہمیشہ ترقی اور بلند مدارج کی امید رکھتے ہیں۔ بلاشبہ، بعض اوقات ہم اسے دوسروں کے ساتھ مسابقت کے طور پر دیکھتے ہیں تاکہ پہلی پوزیشن حاصل کی جائے، لیکن مقصد صرف یہی نہیں ہونا چاہیے۔ اصل اہمیت محض نمبر ون بننے کی نہیں، بلکہ حقیقی محنت اور جدوجہد کے ذریعے امتیاز حاصل کرنے کی ہے، تاکہ ہم انسان کو اس درجے پر پہنچا سکیں جس کا وہ مستحق ہے، اور حرم مقدس حسینی کے شایانِ شان ایک منفرد معیار قائم کر سکیں۔
انہوں نے مزید کہا:
ہمیں سائنسی شعبوں پر بھرپور توجہ دینی چاہیے، کیونکہ آج کے انسانی معاشرے میں ان کی اہمیت بہت زیادہ ہے۔ بعض لوگ ایسے شعبے منتخب کرتے ہیں جو مالی یا دیگر فوائد کی وجہ سے زیادہ مقبول ہوتے ہیں، لیکن جامعة وارث (علیہ السلام) اور دیگر تعلیمی اداروں کو چاہیے کہ وہ موجودہ دور کے اہم سائنسی تخصصات کی طرف توجہ دیں۔ ہمیں معاشرے میں ایسے علوم کی ترویج کرنی چاہیے جو حقیقتاً مفید ہوں، کیونکہ بعض تخصصات میں لوگوں کی بڑی تعداد دلچسپی لے رہی ہے، حالانکہ ان کی معاشرتی ضرورت اتنی زیادہ نہیں جتنی کہ بعض دیگر اہم علوم کی ہے۔
آخر میں، انہوں نے اپنی گفتگو کا اختتام کرتے ہوئے کہا:
ہم امید کرتے ہیں کہ ایسے سائنسی شعبے متعارف کرائے جائیں جو آج کے دور میں انسانی معاشروں کی ترقی میں بنیادی کردار ادا کر سکتے ہیں۔ ساتھ ہی، اعلیٰ تعلیم (ماسٹرز اور پی ایچ ڈی) کو بھی بھرپور توجہ دی جائے اور اسے اس کی حقیقی اہمیت دی جائے۔ افسوس کی بات ہے کہ کچھ تعلیمی ادارے اس پہلو کو نظر انداز کر دیتے ہیں، لہٰذا جامعہ کو چاہیے کہ وہ اس میدان میں نمایاں ہو اور اعلیٰ تعلیم کے دروازے کھولنے اور ان پر توجہ دینے کے لیے پختہ عزم اور ارادہ رکھے، تاکہ اس جامعہ کی علمی وقار اور اعلیٰ تعلیم میں مضبوط حیثیت تسلیم کی جائے۔
