حرم مقدس حسینی سے وابستہ وارث الانبیاء (علیہ السلام) یونیورسٹی نے عرب کونسل فار ہیلتھ اسپیشلائزیشنز (عرب بورڈ) کے ایک اعلیٰ سطح کے تعلیمی وفد کا استقبال کیا ہے۔ یہ دورہ سائنسی تعاون کو فروغ دینے اور قومی و عرب تعلیمی معیارات کے مطابق طبی تعلیم کے معیار کو بلند کرنے کے فریم ورک کے تحت کیا گیا ہے۔
وارث الانبیاء (علیہ السلام) یونیورسٹی کے صدر، پروفیسر ڈاکٹر ابراہیم سعید الحیاوی نے گفتگو کرتے ہوئے بتایا کہ: "یونیورسٹی نے عرب کونسل فار ہیلتھ اسپیشلائزیشنز کے ایک وفد کی میزبانی کی، جس کی قیادت عرب بورڈ فار جنرل سرجری کے چیئرمین اور لیبیا کے سابق وزیر صحت پروفیسر ڈاکٹر حتیوش فرج حتیوش، اور عراق میں کونسل کے صدر پروفیسر ڈاکٹر سعد عبداللہ سرسم کر رہے تھے۔ وفد میں کونسل کے متعدد اراکین کے ساتھ کربلا، القادسیہ اور حمورابی یونیورسٹیوں کے میڈیکل کالجز کے ممتاز اساتذہ بھی شامل تھے۔ اس دورے کا مقصد علمی تعاون کو مضبوط بنانا اور عرب و قومی معیارات کے مطابق طبی تعلیم کے معیار کو بہتر بنانا ہے۔"
انہوں نے مزید کہا کہ: "یہ دورہ میڈیکل کالج کی جانچ اور تشخیص کی اسٹریٹجک پالیسی کا حصہ ہے۔ وفد کے اراکین نے فائنل ایئر کے طلباء کے جامع کلینیکل امتحانات میں بیرونی ممتحن اور جائزہ کار کے طور پر شرکت کی۔ ان امتحانات میں جنرل سرجری، انٹرنل میڈیسن ، شعبہ اطفال (پیڈیاٹرکس)، اور گائناکالوجی و اوبسٹیٹرکس (علمِ زچگی و امراضِ نسواں) کے شعبے شامل تھے، جس کا مقصد علمی ساکھ کو مضبوط کرنا اور طبی تعلیم کے نتائج کی اعلیٰ کیفیت کو یقینی بنانا ہے۔"
انہوں نے واضح کیا کہ: "وفد نے فیلڈ ٹور کے دوران امتحانات کے طریقہ کار، بہترین نظم و ضبط، امتحانی اسٹیشنوں کی تعداد اور طلباء کی کارکردگی کے تسلسل کا جائزہ لیا۔ اس کے ساتھ ہی امتحانات کی نگرانی کرنے والے اساتذہ کی علمی قابلیت کا بھی معائنہ کیا گیا۔ وفد نے طلباء کی علمی اور عملی مہارت کے اعلیٰ معیار کی تعریف کی، جو کالج کے اپنائے گئے تعلیمی پروگراموں کی عمدہ کیفیت کا منہ بولتا ثبوت ہے۔"
ڈاکٹر الحیاوی نے اس بات پر زور دیا کہ: "عرب کونسل فار ہیلتھ اسپیشلائزیشنز سے بیرونی جائزہ کاروں کی میزبانی کوالٹی اور اکیڈمک ایکریڈیٹیشن (تعلیمی منظوری) کے معیارات کو مستحکم کرنے کی جانب ایک اہم قدم ہے۔ یہ وارث الانبیاء (علیہ السلام) یونیورسٹی کے علمی مقام اور طبی تعلیم میں بہترین عالمی طریقہ کار کو اپنانے کی مسلسل کوششوں کی عکاسی کرتا ہے۔"
واضح رہے کہ حرم مقدس حسینی سے وابستہ وارث الانبیاء (علیہ السلام) یونیورسٹی نصاب کی تیاری، مقامی و بین الاقوامی تعلیمی ماہرین کی خدمات حاصل کرنے، اور معتبر علمی اداروں کے ساتھ شراکت داری کو وسعت دے کر یونیورسٹی کی تعلیم کے معیار کو بلند کرنے کے لیے اپنی حکمت عملی پر عمل پیرا ہے، تاکہ عالمی معیارات کے مطابق اعلیٰ تعلیمی نتائج حاصل کیے جا سکیں، بالخصوص طبی اور صحت کے شعبوں میں۔
اترك تعليق