حرم مقدس حسینی کے شعبۂ صحت و طبی تعلیم کے زیرِ انتظام گھر پر طبی نگہداشت فراہم کرنے والے مرکز سلامتک نے (اُمّ ابیہا... آپ کی خدمت ہمارے لیے باعثِ شرف ہے) کے عنوان سے ایک خصوصی اقدام شروع کیا ہے۔
اس اقدام کا مقصد بین الحرمین شریفین کے علاقے میں زائرین کو مفت طبی اور آگاہی خدمات فراہم کرنا، صحت سے متعلق شعور اجاگر کرنا اور مختلف بیماریوں سے بچاؤ کے حوالے سے رہنمائی کرنا ہے۔
مرکز کے ڈائریکٹر ڈاکٹر محمد حمزہ نے گفتگو کرتے ہوئے بتایا کہ اس اقدام کے تحت زائرین کے لیے خون میں شوگر اور بلڈ پریشر کی مفت جانچ، اہم جسمانی علامات اور وزن کی نگرانی، نیز طبی مشاورت کی سہولت فراہم کی جا رہی ہے۔
انہوں نے کہا کہ یہ اقدام صحت مند طرزِ زندگی اور بالخصوص ذیابیطس، ہائی بلڈ پریشر اور موٹاپے جیسی دائمی بیماریوں سے بچاؤ کے حوالے سے شعور بیدار کرنے کی کوششوں کا حصہ ہے۔ اس دوران زائرین کو طبی ہدایات اور مفید مشورے فراہم کرنے کے ساتھ مرکز کی جانب سے گھریلو طبی نگہداشت کے شعبے میں پیش کی جانے والی خدمات سے بھی آگاہ کیا جائے گا۔
ڈاکٹر محمد حمزہ نے مزید بتایا کہ اس اقدام کے تحت ہر جمعرات کی شام (شبِ جمعہ) بین الحرمین شریفین کے علاقے رحاب میں زائرین کا استقبال کیا جائے گا، تاکہ وہ مفت طبی معائنے اور مشاورت سے استفادہ کرنے کے ساتھ مرکز کی خدمات سے بھی واقف ہو سکیں۔
یہ اقدام حرم مقدس حسینی اور اس کے طبی اداروں کی جانب سے شہریوں اور زائرین کو طبی سہولیات کی فراہمی کا دائرہ وسیع کرنے، صحت عامہ سے متعلق شعور اجاگر کرنے اور بیماریوں کی بروقت تشخیص و احتیاطی تدابیر کو فروغ دینے کی کوششوں کا حصہ ہے۔
