حرم مقدس حسینی کے زیرِ اہتمام وارث انٹرنیشنل کینسر ٹریٹمنٹ سینٹر کی جینیاتی لیبارٹری نے سال 2026 کے ابتدائی 10 ماہ کے دوران تقریباً 1500 مریضوں کے کیسز کا معائنہ کیا، جن میں خلوی جینیات اور سالماتی جینیات کے مختلف ٹیسٹ شامل تھے۔ ان مریضوں کا تعلق عراق کے مختلف صوبوں سے تھا۔
لیبارٹری کے شعبہ خلوی جینیات کی سربراہ ڈاکٹر ہدیٰ ہلال محمد نے گفتگو کرتے ہوئے بتایا کہ لیبارٹری میں آنے والے مریضوں میں کینسر کے مریضوں کے علاوہ موروثی و جینیاتی امراض میں مبتلا افراد بھی شامل تھے، جن کا تعلق شمالی عراق سمیت مختلف صوبوں سے تھا۔
انہوں نے وضاحت کی کہ یہ ٹیسٹ کروموسومز اور جینز میں ہونے والی تبدیلیوں کی نشاندہی کرنے اور ڈاکٹروں کو بیماری کی نوعیت کی تشخیص میں معاون معلومات فراہم کرنے میں اہم کردار ادا کرتے ہیں۔
انہوں نے مزید بتایا کہ کروموسومز کی ساخت اور تعداد معلوم کرنے کا ٹیسٹ خلوی جینیات کے بنیادی معائنوں میں شمار ہوتا ہے۔ اس کے ذریعے کروموسومز کی تعداد یا ساخت میں پائی جانے والی خرابیوں کا پتا لگایا جاتا ہے، جس سے ڈاؤن سنڈروم، ٹرنر سنڈروم اور کلائن فیلٹر سنڈروم سمیت متعدد جینیاتی عوارض کی تشخیص میں مدد ملتی ہے۔
ان کے مطابق اس ٹیسٹ کا استعمال صرف موروثی بیماریوں کی تشخیص تک محدود نہیں بلکہ بچوں میں بعض پیدائشی نقائص، مرد و خواتین میں بانجھ پن کی بنیادی وجوہات، بار بار حمل ضائع ہونے، نوزائیدہ بچوں میں جنسی اعضاء کی غیر واضح ساخت، پہلی ماہواری میں تاخیر، بلوغت میں تاخیر اور ماہواری بند ہونے کی بعض وجوہات کی جانچ کے لیے بھی کیا جاتا ہے۔
انہوں نے بتایا کہ لیبارٹری میں مخصوص کروموسومی اور جینیاتی تبدیلیوں کی نشاندہی کا ٹیسٹ بھی کیا جاتا ہے، جو خصوصاً کینسر اور خون کی بیماریوں کے مریضوں کی تشخیص میں استعمال ہوتا ہے۔ اس مقصد کے لیے ہر مریض کی بیماری کے مطابق موزوں نمونوں کا تجزیہ کیا جاتا ہے۔
سالماتی جینیات کے حوالے سے انہوں نے وضاحت کی کہ اس شعبے میں جدید ٹیکنالوجی کے ذریعے ڈی این اے کی سطح پر جینیاتی تبدیلیوں کا پتا لگایا جاتا ہے۔ اس مقصد کے لیے جینیاتی مادے کی افزائش اور جینیاتی ترتیب معلوم کرنے کی تکنیکیں استعمال کی جاتی ہیں، جن کے ذریعے مخصوص جینز کی شناخت اور ان میں ہونے والی تبدیلیوں کا تجزیہ ممکن ہوتا ہے۔
واضح رہے کہ وارث انٹرنیشنل کینسر ٹریٹمنٹ سینٹر کی جینیاتی لیبارٹری میں خلوی جینیات اور سالماتی جینیات کے خصوصی شعبے موجود ہیں، جہاں کروموسومز کی خرابیوں اور مختلف بیماریوں سے منسلک جینیاتی تبدیلیوں کی تشخیص کے لیے متعدد خصوصی ٹیسٹ فراہم کیے جاتے ہیں۔
