حرم مقدس حسینی کے شعبہ مرمت و دیکھ بھال کے فنی اور انجینئرنگ عملے نے اعلیٰ دینی مرجعیت کے نمائندے شیخ عبد المہدی کربلائی اور حرم مقدس حسینی کے سیکریٹری جنرل جناب حسن رشید جواد العبایجی کی ہدایت پر صوبہ کربلا کے مرکزی علاقے میں واقع دو اسکولوں، مدرسہ فاطمہ الصغریٰؑ للبنات اور مدرسہ الہاشمیہ للبنین کی تزئین و آرائش اور رنگ و روغن کا کام مکمل کر لیا ہے۔
شعبہ مرمت و دیکھ بھال کے سربراہ انجینئر عبد الحسن محمد نے گفتگو کرتے ہوئے بتایا کہ اس منصوبے کے تحت دونوں اسکولوں کے تدریسی کمروں، انتظامی ہالز، راہداریوں، سیڑھیوں اور اندرونی و بیرونی دیواروں پر مکمل رنگ و روغن کیا گیا۔
انہوں نے مزید بتایا کہ دروازوں اور حفاظتی جنگلوں کی رنگائی بھی نئے سرے سے کی گئی، جبکہ دیواروں اور چھتوں کے متاثرہ حصوں کی مرمت بھی انجام دی گئی، جس سے دونوں اسکولوں کی مجموعی ظاہری حالت بہتر ہوئی ہے۔
انہوں نے وضاحت کی کہ یہ اقدام حرم مقدس حسینی کے اس وژن کا حصہ ہے جس کے تحت تعلیمی شعبے کی معاونت اور اسکولوں کے ماحول کو بہتر بنانے پر خصوصی توجہ دی جا رہی ہے، کیونکہ آنے والی نسلوں کے لیے مناسب تعلیمی ماحول کی فراہمی بنیادی اہمیت رکھتی ہے۔
انجینئر عبد الحسن محمد نے مزید کہا کہ شعبہ مرمت و دیکھ بھال حرم مقدس حسینی کی حدود سے باہر بھی اپنی خدمات کا سلسلہ جاری رکھے ہوئے ہے، جن میں اسکولوں اور سرکاری اداروں کو بھی شامل کیا گیا ہے۔ یہ اقدامات حرم مقدس حسینی کی سماجی ذمہ داریوں کی ادائیگی اور شہریوں کو فراہم کی جانے والی خدمات کے معیار کو بہتر بنانے کے عزم کا اظہار ہیں۔
