روضہ مبارک امام حسین علیہ السلام کے شعبہ انجینئرنگ پروجیکٹس سے وابستہ شعبہ کولنگ (ریفریجریشن) نے زیارت اربعین کے خصوصی منصوبے کے تحت صحنِ مطہر اور اس کے ارد گرد کے علاقوں میں مکمل کولنگ سسٹم فراہم کرنے کا اعلان کیا ہے، تاکہ زائرین کے لیے آرام دہ ماحول فراہم کیا جا سکے اور شدید گرمی سے نمٹا جا سکے۔
انجنئیرنگ پروجیکٹس کے شعبہ کولنگ کے سربراہ، صفاء علی حسین نے گفتگو کرتے ہوئے بتایا: "روضہ مبارک امام حسین علیہ السلام کے شعبہ کولنگ نے زیارتِ اربعین کے لیے اپنے منصوبے کے تحت حرمِ مطہر اور اطراف میں ایک جامع کولنگ سسٹم فراہم کیا ہے، جس کا مقصد زائرین کو سہولت دینا اور درجہ حرارت کی شدت کو کم کرنا ہے۔"
انہوں نے وضاحت کی: "ہمارا منصوبہ دو اہم محوروں پر مشتمل ہے۔ پہلا محور روضہ مبارک کے اندرونی حصوں اور حرمِ مطہر کو ٹھنڈا رکھنا ہے، جس کے لیے (9,650) ٹن کولنگ کی صلاحیت کا حامل 'فل فریش' سینٹرل ایئر کنڈیشننگ سسٹم فعال کیا گیا ہے۔"
انہوں نے مزید کہا: "سب سے بڑا چیلنج باہر کے کھلے مقامات کو ٹھنڈا رکھنا تھا جہاں زائرین کا شدید ہجوم ہوتا ہے۔ اس مقصد کے لیے اطراف کے میدانوں اور راستوں میں (4,200) سے زائد صنعتی ایئر کولرز، (450) واٹر مِسٹ پنکھے اور جدید ترین ٹیکنالوجی سے لیس (35) فاگ کیننز نصب کیے گئے ہیں۔"
ان کا کہنا تھا: "یہ بیرونی کولنگ سسٹمز ارد گرد کے درجہ حرارت کو تقریباً 9°C تک کم کرنے میں مدد فراہم کرتے ہیں، جس سے زائرین کو زیارت کے مناسک ادا کرنے کے لیے زیادہ سازگار ماحول میسر آتا ہے۔"
انہوں نے اس بات پر بھی زور دیا کہ: "استعمال شدہ تمام کولنگ سسٹمز اور آلات حرم مقدس حسینی کے زیرِ انتظام 'الوارث انجینئرنگ انڈسٹریز فیکٹری' کے تیار کردہ ہیں، جو سروس اور انجینئرنگ کے منصوبوں میں ملکی صلاحیتوں پر اعتماد کا مظہر ہے۔"
روضہ مبارک امام حسین علیہ السلام زائرین کو بہترین سہولیات فراہم کرنے کے لیے اپنے انسانی، فنی اور انجینئرنگ کی تمام تر صلاحیتوں کو بروئے کار لاتے ہوئے زیارتِ اربعین کے جامع منصوبے پر عمل پیرا ہے، تاکہ زائرین ایک محفوظ اور پرسکون ماحول میں زیارت باآسانی انجام دے سکیں۔
