بصرہ میں کینسر کے علاج کے لیے قائم الثقلین ہاسپٹل نے—جو کہ حرم مقدس حسینی کے ہیلتھ اینڈ میڈیکل ایجوکیشن اتھارٹی سے وابستہ ہے—ماہر ترین طبی عملے اور جدید ترین ٹیکنالوجی کی مدد سے ایک 10 سالہ بچے کے سینے کی بائیں دیوار میں پھیلے ہوئے ایک پچیدہ اور نایاب قسم کے کینسر کو نکالنے کا کامیاب آپریشن کیا ہے۔
ہاسپٹل کی جانب سے جاری کردہ ایک بیان میں بتایا گیا ہے کہ: "حرم مقدس حسینی کی ہیلتھ اینڈ میڈیکل ایجوکیشن اتھارٹی سے منسلک بصرہ کے الثقلین آنکولوجی ہاسپٹل نے جدید ترین طبی آلات اور ماہر ترین سرجنز کی بدولت ایک 10 سالہ بچے کے سینے کی بائیں جانب کی دیوار میں گہرائی تک پھیلے ہوئے کینسر کو نکالنے کا پچیدہ اور انتہائی اہم آپریشن کامیابی سے ہمکنار کیا ہے۔"
بیان میں مزید وضاحت کی گئی ہے کہ: "اس آپریشن کا شمار ان سرجریز میں ہوتا ہے جو جراحت کی دنیا میں ایک بڑا چیلنج سمجھی جاتی ہیں، کیونکہ یہ رسولی جلد (skin)، زیرِ جلد (subcutaneous) اور سینے کی دیوار کے پٹھوں تک پھیلی ہوئی تھی۔ ہمارے طبی عملے نے اس رسولی کو مکمل طور پر نکالنے میں کامیابی حاصل کی، جس کے بعد متاثرہ حصے کی بحالی (ترمیم) کے لیے بچے کی پیٹھ سے پٹھوں اور جلد کا ایک حصہ لے کر سینے کی دیوار پر پیوند کاری کی گئی۔"
اس حوالے سے مزید بتایا گیا کہ: "یہ طبی کامیابی ہاسپٹل کے اندر مختلف شعبوں کی مشترکہ کوششوں کا نتیجہ ہے۔ یہ آپریشن تھوراسک سرجری اور کینسر سرجری کی ٹیموں کے درمیان اعلیٰ سطح کے تعاون اور ہم آہنگی کے ساتھ انجام پایا۔ آپریشن کے بعد بچے کو اچھے اور مکمل مستحکم حالات میں آپریشن تھیٹر سے شفٹ کر دیا گیا ہے۔"
یہ نیا طبی کارنامہ ان غیر معمولی کوششوں کا آئینہ دار ہے جو حرم مقدس حسینی اپنے الثقلین آنکولوجی ہاسپٹل اور دیگر طبی اداروں کے ذریعے سرانجام دے رہا ہے۔ ان اقدامات کا بنیادی مقصد عراق کے اندر ہی جدید ترین طبی ٹیکنالوجی اور انتہائی لائق سرجنز کی خدمات فراہم کرنا ہے، تاکہ مریضوں کے خاندانوں بالخصوص بچوں کے والدین کے کندھوں سے علاج کا بوجھ کم کیا جا سکے اور بین الاقوامی معیار کے مطابق جدید ترین طبی خدمات مہیا کی جا سکیں۔
