حرم مقدس حسینی کے شعبۂ توسیعی منصوبہ جات نے اعلان کیا ہے کہ صحنِ عقیلہ زینبؑ میں واقع مقامِ تل زینبیؑ توسیعی منصوبے کے پہلے مرحلے میں شامل ان حصوں میں سے ہوگا جو آئندہ چھ ماہ کے دوران مکمل ہو کر تیار ہو جائیں گے۔ منصوبے پر کام تیزی سے جاری ہے اور تعمیراتی پیش رفت اہم مراحل تک پہنچ چکی ہے۔
شعبے کے سربراہ انجینئر حسین رضا مہدی نے گفتگو کرتے ہوئے بتایا کہ توسیع کے بعد مقامِ تل زینبیؑ کا مجموعی رقبہ 4,500 مربع میٹر ہو گیا ہے، جبکہ منصوبے کے آغاز سے قبل اس کا رقبہ صرف 300 مربع میٹر تھا۔
انہوں نے وضاحت کی کہ مقام کی عمارت دو زیرِ زمین منزلوں، ایک زمینی منزل اور زمین سے اوپر نصف منزل پر مشتمل ہے۔
انہوں نے مزید بتایا کہ مقام کے بعض حصوں میں تعمیراتی کام کی تکمیل کی شرح 98 سے 99 فیصد تک پہنچ چکی ہے، جبکہ باقی ماندہ کاموں میں بنیادی طور پر کولنگ (ایئر کنڈیشننگ) کے نظام کی تکمیل شامل ہے، جسے متعلقہ شعبہ انجام دے رہا ہے۔ توقع ہے کہ آئندہ چار سے پانچ ماہ کے دوران مقامِ تل زینبیؑ اور منصوبے کے دیگر حصوں میں بھی کولنگ کا نظام فعال کر دیا جائے گا۔
انجینئر حسین رضا مہدی نے مزید کہا کہ مقامِ تل زینبیؑ، صحنِ عقیلہ زینبؑ کے توسیعی منصوبے کے پہلے مرحلے کے اہم حصوں میں سے ایک ہے۔ اس مرحلے میں درج ذیل مقامات اور سہولیات بھی شامل ہوں گی:
مقامِ تل زینبیؑہالِ علی اکبرؑسردابِ امام حسینؑ200 جدید صحت و صفائی کی سہولیات (بیت الخلاء)واضح رہے کہ صحنِ عقیلہ زینبؑ کے اس منصوبے کا مجموعی رقبہ تقریباً 160,000 مربع میٹر ہے۔ یہ منصوبہ صحنِ امام حسینؑ کی وسیع تر توسیع کے بڑے منصوبے کا پہلا مرحلہ ہے، جس کا مقصد زائرین کی بڑھتی ہوئی تعداد کو مدنظر رکھتے ہوئے اضافی جگہیں اور ضروری خدمات و سہولیات فراہم کرنا ہے۔
