حرم مقدس حسینی کے ہیلتھ اینڈ میڈیکل ایجوکیشن اتھارٹی نے ہیلتھ ڈیزاسٹر مینجمنٹ سینٹر کے ذریعے کربلا معلیٰ میں ایک ہنگامی ہیلتھ الرٹ جاری کیا ہے۔ اس سلسلے میں امام حسین علیہم السلام کے زائرینِ اربعین کو جدید ترین طبی سہولیات فراہم کرنے کے لیے مربوط ڈیجیٹل اور مصنوعی ذہانت (AI) کی جدید ترین ٹیکنالوجی سے لیس طبی کیمپ قائم کیے گئے ہیں۔
ہیلتھ ڈیزاسٹر مینجمنٹ سینٹر کے ڈائریکٹر ڈاکٹر مہدی رضوی نے بتایا کہ: "یہ طبی کیمپ اعلیٰ ترین مرجع دینی کے نمائندے شیخ عبدالمهدی الکربلائی کی ہدایات اور سکریٹری جنرل استاد حسن رشید جواد العبایجی کی نگرانی میں قائم کیا گیا ہے۔ جدید طبی آلات اور مصنوعی ذہانت پر مبنی تشخیص و علاج کی سہولیات کی وجہ سے یہ اپنی نوعیت کا دنیا میں پہلا ڈیجیٹل میڈیکل کیمپ ہے۔"
انہوں نے مزید کہا: "یہ طبی کیمپ زائرین کو فراہم کی جانے والی صحت کی خدمات میں ایک انقلابی پیش رفت ہے۔ اس میں استعمال ہونے والے انٹیلیجنٹ سسٹمز بیماریوں کی فوری تشخیص اور طبی عملے کو علاج سے متعلق فیصلے کرنے میں مدد دیتے ہیں، جس سے ہنگامی صورتحال میں فوری ردِعمل اور طبی دیکھ بھال کا معیار مزید بلند ہوا ہے۔"
ڈاکٹر رضوی نے وضاحت کی کہ مرکز نے خصوصی طبی ٹیمیں بھی تشکیل دی ہیں جن میں ہارٹ اٹیک کی صورت میں فوری طبی امداد کے ماہرین، ہنگامی حادثات اور اجتماعی زخموں سے نمٹنے والی ٹیمیں، اور فرسٹ ایڈ کی ٹیمیں شامل ہیں تاکہ چوبیس گھنٹے زائرین کو بروقت طبی امداد یقینی بنائی جا سکے۔
انہوں نے مزید بتایا کہ اس کیمپ میں ایک مکمل ڈیجیٹل لیبارٹری اور جدید ترین طبی آلات فراہم کیے گئے ہیں، جہاں انتہائی تجربہ کار اور ماہر ڈاکٹرز اور نرسنگ اسٹاف ہنگامی صورتحال کے عالمی طبی پروٹوکول کے مطابق خدمات انجام دے رہے ہیں۔
ڈاکٹر مہدی رضوی نے زور دیا کہ یہ اقدام حرم مقدس حسینی کے اس جامع ہیلتھ پلان کا حصہ ہے جو زیارتِ اربعین کے موقع پر ملینز زائرین کی سہولت، ہنگامی طبی صورتحال سے نمٹنے اور جدید ترین ڈیجیٹل ٹیکنالوجی کے استعمال کے لیے ترتیب دیا گیا ہے۔
واضح رہے کہ حرم مقدس حسینی زیارتِ اربعینِ امام حسین (ع) کے موقع پر اپنے تمام سروس، میڈیکل، انجینئرنگ اور میڈیا کے شعبہ جات کو ہائی الرٹ رکھتے ہوئے کربلا معلیٰ کی جانب آنے والے تمام راستوں اور سرحدی راستوں پر زائرین کو بہترین، محفوظ اور منظم سہولیات فراہم کر رہا ہے۔
