امامین علی اور محمد الجواد علیہما السلام کی ولادت کی مناسبت سے، مرکزِ حضرت زینب کبریٰ علیہا السلام برائے تخصصی جراحیِ چشم نے، میثاق میڈیکل رضاکار گروپ کے تعاون سے، (النبا والمراد) کے عنوان سے مفت مہم کے آغاز کا اعلان کیا ہے، جو 10 رجب (11 جنوری 2025) سے لے کر 21 رجب (22 جنوری 2025) تک جاری رہے گی۔
مرکز کے ڈائریکٹر ڈاکٹر عدی السلامی نے گفتگو کرتے ہوئے کہا کہ اعلیٰ دینی مرجعیت کے نمائندے اور حرم مقدس حسینی کے متولی شرعی شیخ عبد المہدی الکربلائی کی ہدایت پر، یہ مفت مہم میثاق میڈیکل رضاکار گروپ اور کربلا مقدسہ کے محکمۂ صحت کے تعاون سے شروع کی جارہی ہے، جو امامین علی اور محمد الجواد علیہما السلام کی ولادت کی مناسبت سے منعقد ہوگی۔
ان کا مزید کہنا تھا کہ یہ مہم مجموعی طور پر 12 دن تک جاری رہے گی اور 10 رجب بمطابق (11 جنوری 2025) سے لے کر 21 رجب بمطابق (22 جنوری 2025) تک جاری رہے گی۔
انہوں نے واضح کیا کہ اس مہم میں مریض کے لیے داخلے کی پرچی، ڈاکٹر سے معائنہ، مشاورتی شعبے میں تمام طبی مداخلتیں، اور مرکز میں موجود تمام آلات کے ذریعے آنکھوں کے تمام ٹیسٹ (جیسے بینائی کی جانچ، شبکیہ کا معائنہ، آنکھ کے پریشر کی جانچ اور دیگر تمام طبی معائنہ جات) اور لیبارٹری ٹیسٹ شامل ہوں گے۔
انہوں نے مزید بتایا کہ آپریشنز کی صورت میں جراحوں کی فیس مکمل طور پر مفت ہوگی، اور وضاحت کی کہ "ان تمام سہولیات کے اخراجات حرم مقدس حسینی برداشت کرے گی۔ تاہم طبی سامان، مثلاً جسم میں لگائی جانے والی عدسات وغیرہ، انتہائی کم قیمتوں پر مریض کو خود ادا کرنا ہوں گی۔
انہوں نے مزید کہا، "اس مہم میں آنکھوں کی جراحی کے ماہر ڈاکٹرز اور بیرونِ ملک سے آنے والی متعدد ٹیمیں بھی شریک ہوں گی۔ ہماری ٹیمیں کربلا مقدسہ کے شہریوں اور زائرین کی خدمت کے لیے ہمہ وقت تیار رہیں گی۔
یاد رہے کہ حرم مقدس حسینی، اعلیٰ دینی مرجعیت کے نمائندے اور اپنے متولی شیخ عبد المہدی الکربلائی کی ہدایات کی روشنی میں، وقتاً فوقتاً مختلف قسم کی کم خرچ اور مفت طبی مہمات کا آغاز کرتی رہتی ہے، اور بالخصوص شہداء کے خاندانوں، غریبوں اور کم آمدنی والے طبقات کو ملک بھر سے بلا معاوضہ طبی سہولیات فراہم کرتی ہے۔
