حرم مقدس حسینی کے شعبۂ اسٹریٹجک منصوبہ جات نے اعلان کیا ہے کہ صوبہ بصرہ میں آٹزم (خود پسندی) کے شکار بچوں کے لیے خصوصی تعلیمی و علاجی مرکز کی تعمیر آخری مراحل میں داخل ہو چکی ہے۔ یہ منصوبہ اعلیٰ دینی مرجعیت کے نمائندے شیخ عبدالمہدی کربلائی کی ہدایت پر عالمی معیار کے مطابق تعمیر کیا جا رہا ہے۔
شعبۂ اسٹریٹجک منصوبہ جات کے سربراہ انجینئر محمد ضیاء محمد نے گفتگو کرتے ہوئے بتایا کہ انجینئرنگ اور فنی عملہ منصوبے کی تکمیل کے لیے تیزی سے کام جاری رکھے ہوئے ہے۔ یہ مرکز صوبہ بصرہ میں آٹزم سے متاثرہ بچوں کی تعلیم و تربیت اور علاج کے حوالے سے ایک اہم خصوصی منصوبہ ہے۔
انہوں نے وضاحت کی کہ یہ منصوبہ مجموعی طور پر 5 دونم اراضی پر تعمیر کیا جا رہا ہے، جبکہ عمارت کا مجموعی رقبہ 10 ہزار 60 مربع میٹر ہے، جو تین مکمل منزلوں پر مشتمل ہوگا۔ اس کی تعمیر میں بچوں کی تعلیمی اور علاجی ضروریات کو مدنظر رکھا گیا ہے۔
ان کے مطابق مرکز میں مختلف سائز کے تعلیمی اور علاجی کمرے، خصوصی علاجی سوئمنگ پول، جسمانی و بحالی کی مشقوں کے لیے ہال، گفتار اور زبان کی تھراپی کے لیے مخصوص کمرے اور بچوں کی ذہنی و تخلیقی صلاحیتوں کو پروان چڑھانے کے لیے ایک فرضی شہر بھی شامل ہوگا۔ اس کے علاوہ انتظامی دفاتر اور مرکزی ریسٹورنٹ بھی تعمیر کیا جا رہا ہے۔
انہوں نے مزید بتایا کہ منصوبے میں وسیع سبزہ زار اور کھیلوں کی سہولیات بھی فراہم کی جائیں گی، جن میں والی بال کے دو میدان اور پانچ کھلاڑیوں پر مشتمل فٹ بال کا ایک میدان شامل ہے، تاکہ بچوں کو تعلیم، علاج اور تفریح کی جامع سہولیات ایک ہی مقام پر میسر آ سکیں۔
یہ منصوبہ حرم مقدس حسینی کی جانب سے خصوصی طبی و تعلیمی بنیادی ڈھانچے کی ترقی اور آٹزم سے متاثرہ بچوں کی دیکھ بھال و بحالی کے لیے جاری کوششوں کا حصہ ہے، جس کا مقصد ان بچوں کی صلاحیتوں کو نکھارنا اور ان کی ضروریات کے مطابق معیاری سہولیات فراہم کرنا ہے۔
