حرم مقدس حسینی کے شعبہ شعائر و مواکبِ حسینی نے حضرت زینب (سلام اللہ علیہا) کی وفات کی یاد منانے کے لیے امام حسین (علیہ السلام) کے صحن کے قریب "لیالیِ زینبیہ" سیمینار کے انعقاد کی تیاریوں کا اعلان کیا ہے، جو کہ 14 سے 16 رجب تک جاری رہے گا۔
شعبہ شعائر و مواکب کے سربراہ جناب محمد کریم نے گفتگو کرتے ہوئے بتایا:
"حرم مقدس حسینی کا شعبہ شعائر و مواکبِ حسینی حضرت زینب (سلام اللہ علیہا) کی برسی کی مناسبت سے 'شب ھائے زینبیہ' سیمینار کے انعقاد کے لیے اپنی تیاریاں مسلسل جاری رکھے ہوئے ہے۔ یہ سیمینار تلِ زینبیہ کے پہلو میں واقع صحنِ عقیلہ (سلام اللہ علیہا) میں 5 سے 7 جنوری 2026 (بمطابق 14 سے 16 رجب) تک منعقد کیا جائے گا۔"
انہوں نے مزید وضاحت کی کہ:
"یہ سیمینار حرم مقدس حسینی کے دیگر متعلقہ شعبوں کے تعاون سے منعقد کیا جا رہا ہے، جس میں کربلا اور عراق کے دیگر صوبوں سے بڑی تعداد میں مواکب شرکت کریں گے۔"
ان کا مزید کہنا تھا کہ:
"سیمینار کے پروگراموں میں سوگ کے ایام کے دوران 'تلِ زینبیہ' کو زائرین کے لیے کھلا رکھنا، قرآنی محافل کا انعقاد، تصویری نمائش، اور مجالسِ عزا شامل ہیں۔ اس کے ساتھ ساتھ پورے مقام اور ملحقہ علاقوں میں سیاہ پرچم اور غم و اندوہ کے بینرز بھی آویزاں کیے جائیں گے۔"
واضح رہے کہ حرم مقدس حسینی، مرجعیتِ عالیہ کے نمائندے شیخ عبد المہدی الکربلائی کی ہدایات کے تحت، عراق کے اکثر صوبوں میں اہل بیت (علیہم السلام) کی ولادت اور وفات کے ایام کی مناسبت سے متعدد پروگراموں اور تقریبات کی سرپرستی اور انعقاد کرتا ہے۔
