حرم مقدس حسینی کے شعبہ فکری و ثقافتی امور اور جامعہ کربلا کے باہمی تعاون سے ایک عظیم الشان بین الاقوامی کانفرنس کا انعقاد کیا گیا۔ اس کانفرنس میں عراق کے علاوہ ایران، یمن، شام اور دیگر ممالک کے محققین اور اسکالرز نے بڑی تعداد میں شرکت کی۔
منتظمین کے مطابق، اس کانفرنس کے انعقاد اور یہاں پیش کیے گئے تحقیقی مقالوں کا بنیادی مقصد معاشرے کے تمام افراد تک آگہی کا پیغام پہنچانا ہے، تاکہ ایک ایسی بیدار امت کی تشکیل کی جا سکے جو حق اور باطل کے درمیان واضح تمیز کرنے کی صلاحیت رکھتی ہو۔
یہ کانفرنس اپنے پہلے ایڈیشن میں خاص طور پر امام علی رضا علیہ السلام کی عظیم شخصیت، آپ کے علوم، احادیث اور روایات کے احاطے پر مرکوز رہی۔ اس موقع پر مختلف ممالک سے تعلق رکھنے والے محققین کی جانب سے 70 سے زائد تحقیقی مقالے پیش کیے گئے، جن کا مقصد اس غریب اور مظلوم امامؑ کی شخصیت اور علمی خزانوں کو دنیا کے سامنے اجاگر کرنا تھا۔
