حرم مقدس حسینی کے زیر نگرانی ہیئة الصحة والتعليم الطبي سے وابستہ مستشفى المجتبى (علیہ السلام) برائے امراض خون و بون میرو ٹرانسپلانٹ نے اپنی لیبارٹری کو بین الاقوامی "ISO 15189" سرٹیفیکیشن ملنے پر ایک شاندار تقریب منعقد کی۔
اسپتال کے جاری کردہ بیان کے مطابق، امراض خون، بلڈ بینک، کیمیکل و ہارمونی ٹیسٹ، کلینیکل امیونولوجی، اور مائیکرو بایولوجی کے شعبہ جات میں اس سرٹیفیکیشن کا حصول ممکن ہوا ہے۔
بیان میں مزید کہا گیا کہ یہ لیبارٹری اب بین الاقوامی سطح پر تسلیم شدہ ہے اور عراق میں سب سے اہم اور جدید ترین لیبارٹریز میں شمار کی جاتی ہے، جہاں نہ صرف روایتی ٹیسٹ کیے جاتے ہیں بلکہ اعلیٰ معیار کی خصوصی تشخیصی سہولیات بھی فراہم کی جاتی ہیں۔ یہ سرٹیفیکیشن عراقی وزارتِ منصوبہ بندی کے ماہرین اور منظور شدہ معائنہ کاروں کی جانچ کے بعد حاصل کیا گیا، جس میں لیبارٹری نے تمام مطلوبہ معیارات پر پورا اترتے ہوئے وسیع پیمانے پر طبی ٹیسٹ مکمل کیے۔
یہ قابلِ ذکر ہے کہ مستشفى المجتبى (علیہ السلام)، جو حرم مقدس حسینی کے طبی اداروں میں سے ایک ہے، عراق میں امراض خون کے علاج اور اسٹیم سیل ٹرانسپلانٹ کے شعبے میں ایک سرکردہ طبی مرکز کے طور پر پہچانا جاتا ہے۔
مزید برآں، عتبہ حرم مقدس حسینی اپنے طبی مراکز اور اسپتالوں کے ذریعے عراق کے شمال سے جنوب، مشرق سے مغرب تک تمام شہریوں کو جدید طبی خدمات فراہم کرتی ہے، ساتھ ہی بیرونِ ملک سے آنے والے مریضوں اور زائرین کو بھی معیاری علاج مہیا کرتی ہے۔
