حرم مقدس حسینی سے وابستہ سفیر امام حسینؑ جراحی ہسپتال اور السیدہ خدیجہ الکبریٰؑ تخصصی ہسپتال برائے خواتین کے طبی و صحت کے عملے نے صوبہ نینویٰ کے تین اضلاع میں انسانی ہمدردی پر مبنی طبی مہم کے دوران تقریباً 3,350 افراد کو طبی معائنے اور علاج کی سہولیات فراہم کیں، جبکہ 590 مریضوں کو جراحی کے لیے ریفر کیا گیا۔
ہسپتال کے انتظامی مدیر انجینئر عباس عبد علی نے بتایا کہ حرم مقدس حسینی کی جانب سے شروع کی گئی اس طبی مہم میں سنجار، بعاج اور تلعفر کے شہریوں کو طبی معائنے، علاج اور زندگی بچانے والی ضروری طبی سہولیات فراہم کی گئیں۔
انہوں نے بتایا کہ ضلع تلعفر میں مہم کے دوران 1,850 افراد کا طبی معائنہ کیا گیا، جن میں سے 340 مریضوں کو مختلف 12 طبی تخصصات میں جراحی کے لیے ریفر کیا گیا۔ اس مہم میں 23 ماہر ڈاکٹروں کے علاوہ نرسنگ اور معاون طبی عملے نے خدمات انجام دیں۔
جبکہ سنجار اور بعاج میں مجموعی طور پر 1,500 افراد نے طبی خدمات سے استفادہ کیا، جن میں سے 250 مریضوں کو ضروری جراحی کے لیے ریفر کیا گیا۔
مہم کے دوران طبی اور لیبارٹری کے عملے نے شہریوں کو جامع طبی ٹیسٹ، ادویات اور علاج سے متعلق ضروری سامان مفت فراہم کیا۔ جراحی کے لیے منتخب مریضوں کو مزید علاج اور ضروری طبی نگہداشت کے لیے کربلا میں واقع سفیر امام حسینؑ جراحی ہسپتال منتقل کرنے کے انتظامات بھی کیے گئے۔
حرم مقدس حسینی کے مطابق یہ انسانی ہمدردی پر مبنی طبی مہم مختلف دور دراز علاقوں اور شہروں تک صحت کی سہولیات پہنچانے کے لیے جاری طبی پروگراموں کا حصہ ہے، جس کا مقصد مریضوں اور ان کے خاندانوں پر علاج اور سفر کے اخراجات کا بوجھ کم کرنا اور ضرورت مند شہریوں کو خصوصی طبی خدمات فراہم کرنا ہے۔
