شہر "سید الأوصیاء العصریہ" جو کہ حرم مقدس حسینی کے زیر انتظام ہے، نے اعلان کیا ہے کہ وہ لبنان سے آنے والے مہمانوں (عراق کے مہمان) خاندانوں کو مختلف خدمات فراہم کرنے کا سلسلہ جاری رکھے ہوئے ہیں۔
شہر کے میڈیا انچارج علی الحسینی نے کہا: "حرم مقدس حسینی کے زیرانتظام شہر 'سید الأوصیاء العصریہ'، جو کربلا مقدسہ-بغداد راستے پر واقع ہے، نے اپنی تمام افرادی قوت اور وسائل کو ایک مہینے سے فعال رکھا ہوا ہے اور اب تک خدمات کی فراہمی جاری رکھی ہوئی ہے تاکہ لبنان سے آنے والے مہمانوں کو مختلف سہولیات فراہم کی جا سکیں۔"
انہوں نے وضاحت کی: "ہم نے شہر کے اندر 6 ہوٹل کمپلیکس مختص کیے ہیں، اس کے علاوہ تمام ضروری سہولیات سے لیس ہالز بھی فراہم کیے گئے ہیں۔"
انہوں نے مزید بتایا کہ: "انتظامیہ نے شہر میں ایک مکمل طبی مرکز اور دو منزلہ مہمان خانہ قائم کیا ہے، جہاں کھانے کی 3 اقسام کھلی بوفے کے انداز میں پیش کی جاتی ہیں۔"
انہوں نے یہ بھی کہا: "شہر نے حرم مقدس حسینی کے مختلف شعبوں کے ساتھ مل کر شہر کے اندر مختلف تعمیری اور ثقافتی سرگرمیاں منعقد کی ہیں۔"
یاد رہے کہ حرم مقدس حسینی نے اعلیٰ دینی مرجعیت کے نمائندے اور اس کے متولی شیخ عبدالمہدی کربلائی کی ہدایات کے تحت، لبنانی عوام کی مدد کے لیے ایک ایمرجنسی سیل قائم کیا ہے۔ اس کے ساتھ ساتھ، متاثرہ لبنانی خاندانوں کی میزبانی کے لیے زائرین کے شہروں کے دروازے کھولے گئے ہیں اور ان کو تمام ضروری سہولیات فراہم کی جا رہی ہیں۔ مزید برآں، لبنانی عوام کے لیے طبی اور انسانی امداد کی مہم بھی شروع کی گئی ہے، جو اعلیٰ دینی مرجعیت کے بیان کی تعمیل میں عمل میں آئی ہے۔
منسلکات
